عمرو أديب بعد حملة الهجوم ضدها: ارفعوا ايديكم عن مربوحة

عمرو أديب بعد حملة الهجوم ضدها: ارفعوا ايديكم عن مربوحة... استنكر الإعلامي عمرو أديب الهجوم الكبير على الفنانة رحمة أحمد، بعد عرض أولى حلقات مسلسل الكبير الجزء السابع، والذي يعرض في شهر رمضان، قائلًا: "الناس اللي بتهاجم مربوحة في حد بيقتل حد كده؟ دا لايمكن يبقى شيء طبيعي".

وخلال تقديمه برنامجه "الحكاية" على فضائية "إم بي سي مصر 2" اليوم السبت، تابع أديب: "أنا معرفش رحمة ولا عمري شوفتها، ولا المسلسل ده تبع القناة بتاعتنا، لكن إزاي الهجوم ده كله عليها هي لحقت دي عملت حلقتين فقط، وبعدين إزاي الهجوم كده، مهي السنة اللي فاتت كانت أعظم حاجه، والسنة دي ملحقتش تعمل أي حاجه".

وأكمل أديب: "عرفنا أن في لجان معمولة على مربوحة، طب إزاي دي ممثلة صغيرة متستحملش إنها تتقتل لمجرد حلقتين، ويتقال بقت بايخة أو مبتضحكش طيب يا جماعة مهو في كاتب ومش مسؤوليتها لوحدها"، موضحًا: "ارحموا الناس يا جماعة، وإذا كان في لجان وراء البنت هتبان مين وراها واللي يعمل كده يبقى إنسان حقير".

وأردف: "المنافسة في الفن بالشكل ده لو صحت تبقى شيء حقير إننا نستخدم لجان عشان نخلص على حد، طب حط نفسك مكان البنت في تاني مسلسل لها تفتح تلاقي هجوم كأنها قامت بجريمة أخلاقية"، مضيفًا: "عايز الناس المحترمة تقف جنب الناس اللي بتبدأ حياتها، وإحنا ياما وقفنا مع ناس واخدنا بايديهم ومش عايز أقول أسامي 20 اسم كانوا بيتداسوا ولكن كان في سندة مننا".

واختتم أديب: "ارفعوا إيديكم عن مربوحة، لو في نقد فني تمام إنما دبح بالشكل ده لا، لأن في فنانين كتير ليهم شكل بيكملوا عليه كتير أوي، لكن تتعمل لجان على بنت صغيرة زي دي إيه الهدف يعني".