شريف منير يتحدث عن خلافه مع شيرين عبد الوهاب.. لأول مرة

شريف منير يتحدث عن خلافه مع شيرين عبد الوهاب.. لأول مرة... كشف الفنان شريف منير العديد من الأسرار في حياته، إلى جانب حديثه عن خلاف سابق بينه وبين الفنانة شيرين عبد الوهاب.

وقال شريف منير خلال لقاء تلفزيوني: "مين مش بيخاف من المجهول، ماليش دعوة باللي جاي لأنه بإيد ربنا، وأهم حاجة عندي ما كنش تقيل على حد وأضايقه خاصة لما الواحد يكبر وينسى ويجي له زهايمر.

وتابع شريف منير عن صفاته: أنا قاسي على نفسي وبلوم اللي حواليا كتير، وليا صديقه من 40 سنة اسمها حنان إسماعيل صاحبتي من سنين طويلة كانت تقول لي ما تجلدش نفسك وسهلها، ومراتي تقول لي ما تقفلهاش.

وأكمل: كان في خلاف بيني وبين حد في الوسط ولو كنت كملت في اللي أنا فيه، كنت هخسر فتنازلي كان مكسب وما خسرتش المعركة بالعكس كان فيه رد اعتبار ليا واعتذار، أحسن ما آخد موقف جامد يخسرني جمهور كبير.

شريف منير يكشف تفاصيل الخلاف بينه وبين شيرين عبد الوهاب

كما تحدث شريف منير عن تفاصيل الخلاف الذي حدث بينه وبين الفنانة شيرين عبد الوهاب قديمًا والذي وصل إلى القسم حيث سألته المذيعة قائلة: الهنجعية خليتك تودي شيرين عبدالوهاب القسم بسبب تكييف بينقط، ليرد منير قائلًا: الموضوع ما كانش بسبب تكييف، كان فيه رخام وطوب بيقع من فوق وولادي يبيلعبوا في التراس وممكن حد يتعور لما اعترضت وزعلت.. رد الفعل كان زيادة وما عرفتش أستحمله وأنا بتغاضى في حدود أكتر من كده يبقى إهانة وتنازل.

وعن رأيه في وضع رقابة على الفن قال: الرقابة والشروط جوه الإنسان وهي إن أنا عندي حدود مش بحب اتعداها، وأنا فنان من حقي أقول رأي في أي فن يتعمل حواليا.

وعن الانتقادات التي يتعرض لها قال: ما بقتش أزعل بنفس القدر اللي كنت بزعل به زمان، لأن العقل بقى أكثر رزانة ولما كنت أشوف هجوم وشتايم انفعل واتنرفز، دلوقتي بدخل أدور على الحاجات اللي بتضايقني علشان بستمتع بالبلوك ولا يخصني وفاكرين أنهم لما يشتموني ولا يتريقوا هزعل.

واستكمل: من كتر ارتباطي بمصر وحبي للوطن عندي علم في بيتي وبيتريقوا عليا ساعات ويقولوا لي فين العلم، ودول في الزبالة على طول لأن اللي يتكلم عن علم مصر ويتريق ويتكلم عن وطنيتي في الزبالة.

وتحدث شريف منير عن الراحل هشام سليم: شفت فيه عزة نفس لأنه عيان وما قالش لحد ولا لجأ لحد ولا قال عالجوني وكان شايل كتير، وكان فيه تليفون بينه وبيني قبل ما يموت بيوم وقلت له أني جاي لك بعد يومين وما لحقتش، المكالمة كان فيها رضا كبير، والرضا من أهم الأشياء اللي تخلي الواحد يتحمل الصعوبات اللي بتحصل حواليه، وكل اللي بيجي من عند ربنا خير وحلو وأنا راضي أوي فوق الوصف، لأن فيه عطف وحنان من ربنا وحب ناس واحترام لذاتي ونفسي وولادي.

شريف منير يكشف حقيقة زواجه على زوجته الأولى وهي مريضة

كما تحدث شريف منير عن حقيقة خدمة زوجته الثانية لـ زوجته الأولى وهي مريضة، قائلًا: مراتي الله يرحمها أم ولادي لما كانت تعبانة مراتي الحالية زارتها مرة واحدة، وما كانتش صاحبتها وما خدمتش حد؛ لكنها راحت معايا وهي تعبانة وراحت مرة واحدة ليها قعدت عشر دقايق.

وأضاف عن حقيقة زواجه على زوجته الأولى وهي مريضة قائلًا: لما اتجوزت على مراتي كانت في عز عنفوانها وعيت بعد جوازي بكذا سنة وأنا مش بالقسوة دي.. وكان في خلاف بينا خيرتها ننفصل قالت لي مش هنفصل وعرفتها أني هتجوز وحياتي كانت ماشية ورجعت تعافت لما خدت الكيماوي، وكانت هي وولادي بيجوا لي كل جمعة في بيتي.