غادة عبد الرازق: طيبتي وجدعنتي ودتني في داهية.. وعملت خدمة مات بسببها بنت

قالت الفنانة غادة عبد الرازق: "طيبتي وجدعنتي وديتني كتير جدا في داهية 100 مرة، ومرة واحدة كنت أعرفها طلبتني في خدمة وهي قريبة مني أوي فقلت لها حاضر وعملت لها الخدمة، وكان واضح أن هما نيتهم مش كويسة، وكانت ثمن الخدمة اللى عملتها لهم أن راحت فيها بنت الست اللى طلبت مني وتوفيت".

حادث وفاة فتاة

وتابعت خلال الجزء الثاني من لقائها ببرنامج "كلام الناس" المذاع على قناة "إم بي سي مصر": "البنت اللي ماتت عملت حادثة وكلموني كانت الساعة 2 بالليل وكانوا حاطينها في مكان قبل ما تموت فقلت لهم انقلوها في مكان تاني، وعرفت أن اللى حصلها مكنش يؤدي إلى الوفاة لأنه كان كسر، وعرضت مساعدة مالية كبيرة لعلاجها في مكان كويس، وهما لما سمعوا الرقم المالي اللي عرضته حبوا يوفروا وياخدوها في مكان تاني وللأسف البنت توفيت".

مشكلة أهل الفتاة

وأضافت: "أهل البنت اللي توفيت وفروا ثمن العلاج وضحوا ببنتهم علشان فرق الفلوس اللي عرضتها لعلاجها".

تعرض غادة عبد الرازق للنصب

وأردفت: "مرات كتير اضحك عليا واتاكل حقي، واتنصب عليا في رقم كبير في الشغل لحد دلوقتي مش عارفة أخده، والمخرج الوحيد اللى ممكن أقوله أنا أسفة الأستاذ هاني إسماعيل لأنه وقف جنبي وساعدني وأعطاني فرص".

وقالت الفنانة غادة عبد الرازق في نفس اللقاء: "لأول مرة منذ 14 سنة أغيب عن دراما رمضان وسايبة الملعب السنة دي لناس غيري تتواجد فيه واستراحة محارب لأن الجو العام اختلف والحسابات اختلفت وحاسة أنه مش هو ده رمضان اللي متعودة عليه السنين اللي فاتت، وبتفرج من بعيد وسايبة التمثيل شوية والدراما لغيري ودايمًا كنت بقول كلمة زمان أن التمثيل مبيخلصش".

رفض أعمال فنية

وتابعت: "محدش عرف يأخد مكاني، بيتعرض عليا أعمال وبرفض لأن هما متخيلين أنها مش لاقية شغل وده مش صح، والإنتاج لنفسي مش عيب وطبيعي".

 

موقف غادة عبد الرازق من دراما 2022

وأضافت غادة عبد الرازق: "أنا قاعدة السنة دي علشان نفسي أتفرج عليكم، وأشوفهم هما بيعملوا إيه، ومحدش فارق معايا مين يزعل ومين ميزعلش، وللأسف لما أنا زعلت محدش وقف معايا، أنا اللى عايزاه يزعل عليا جمهوري وأنا أزعل عليه".

وشاركت غادة عبد الرازق الجمهور مجموعة صور لخطوبة ابنتها، وعلقت قائلة: "تهانينا حبيبتي روحي كل شيء في هذه الحياة.. أتمنى أن تعطيك الحياة القادمة كل ما تريدين لأنك تستحقين.. أحبك كثيرًا".

وفي سياق آخر كشفت الفنانة غادة عبد الرازق لأول مرة عن سبب عدم حضورها المهرجانات المختلفة التي تُقام في مصر.