فيديو.. صاحبة الفستان الأزرق: هو انتوا لما بتروحوا فرح بتشغلوا قرآن؟

ردت ياسمين المعروفة على مواقع التواصل الاجتماعي بـ صاحبة الفستان الأزرق، خلال مداخلة هاتفية عبر برنامج الحكاية مع الإعلامي عمرو أديب والمذاع على قناة إم بي سي مصر، على مهاجميها من نشطاء السوشيال ميديا، بعد انتشار مقطع فيديو لها وهي ترقص بأحد الأفراح، وانتشر كالنار عبر صفحات عديدة، حتى تصدرت تريند السوشيال ميديا.

وقالت ياسمين: جرابيع السوشيال ميديا مطلعة إشاعات عليا من غير وجه حق، أنا عارفة إني كنت بتصور من فيديو القاعة، ده ميخليش حد يطلعه تريند ويتدخل في عرضي، ووقتها كنت تايهة ومش عارفة أسكت ولا آخد إجراء.

صاحبة الفستان الأزرق

وأضافت صاحبة الفستان الأزرق: أنا كنت معترضة أنزل امتحاني وأمي اللي قالتلي إنزلي، إنتي معملتيش حاجة غلط، والقاعة كنا طالبين منها أنها متنزلش الفيديو، أنا كنت برقص وسط الحريم، وكان في 3 رجالة بس وكام شاب من الفرقة، دول أصلا طالعين شو في الفرح.

وواصلت ياسمين صاحبة الفستان الأزرق: أنا أهلي كانوا معايا وتحملوا كمية كلام سيء من ناس منعرفهاش، لكن هما كانوا بيقولولي اتطمني وانزلي ودعموني، أنا كنت ماشية مكسوفة في الجامعة وبقول يا حيطة داريني، أنا مأجرمتش بس كلام الناس وحش، الناس مبترحمش.

وأكملت ياسمين: أنا لو متجوزة هقول مينفعش وهحترم جوزي، لكن أنا بنوتة في فرح عائلي دي فرحة ومتحكمش عليا أحكم على أهل بيتك، وتربيتي متخلينيش أقول اللي قالوه، أنت بأي حق تغلط فيا وفي أهلي، أنت متعرفنيش، طلعتوا إشاعات عليا، جوزتوني وطلقتوني وخلفتوني.

وبينت صاحبة الفستان الأزرق خلال المكالمة الهاتفية: أنا مليش غير أخت واحدة وحزينة عليا وصحابها كلهم قالولها ايه اللي اختك عاملاه ده، هو أنا كنت عملت ايه انتوا بتعاقبوني ومتعاقبوش الناس على السوشيال ميديا، أنا منزلتوش برغبتي ومكانش حتى عندي الجرأة اني اطلع عشان كدة كنت مختفية، كلام الناس كان دابحني، مش عيب أن احنا بنرقص، والناس دي مبيقوموش من مكانهم ولا بيشغلوا قرآن في الفرح؟.

وردت ياسمين على سؤال عمرو أديب إذا كانت سترقص مرة أخرى في الأفراح، وقالت: مش عارفة بس أنا هفرح، أنا مش هسمح لحد يسيء ليا ولا لأي بنت وكلنا بنغلط.