صاحبة الفستان الأزرق مع عمرو أديب: أنا ما أجرمتش وكنت عارفة إني بتصور

صاحبة الفستان الأزرق، قالت ياسمين ياسر صاحبة الفستان الأزرق: "أنا والعروسة قرايب والفرح كان عائلي وطلبنا من صاحب القاعة إن الفيديو ما ينزلش على السوشيال ميديا منذ وقت حجز القاعة وإن التصوير يكون تبعنا وبس وخلصت الليلة".

وأضافت: "لقيت الفيديو نزل بعد يومين من الفرح عرفت الساعة 3 الفجر لقيت زمايلي في الكلية بيكلموني أنتِ طالعة تريند أول على التيك توك والفيديو جايب 2 مليون مشاهدة وقالوا لي واحد اسمه أحمد حسن صاحب القاعة منزله على الفيديو وأنا وقتها اتصدمت ودخلت في حالة انهيار وبأي حق هو يعمل كده أنا مش عارفة، أنا لا اتجوزت ولا اتخطبت ولا زي ما بيقولوا اتقرا فاتحتي أنا آنسة وطالبة في السنة الأخيرة بكلية الآداب قسم الآثار".

فيديو قاعة الفرح

وأضافت خلال مداخلة هاتفية ببرنامج “الحكاية” الذي يقدمه الإعلامي عمرو أديب بقناة “إم بي سي مصر”: "أنا كنت عارفة إني بتصور من فيديو القاعة ودا ما يخليش حد ما لهوش أي لازمة ياخده وينشره ويتكلم في عرضي وده اللي خلاني أتخذ ضده إجراء قانوني واللي يتعاقب صاحب القاعة لأن طلبنا منه عدم نشر أي فيديو في الفرح".

 

الرقص في الأفراح ووصمة العار

وتابعت صاحبة الفستان الأزرق: "أنا ما أجرمتش ولا كنت في وضع مخل ولا دي وصمة عار لكن كلام الناس وحش وما بترحمش بعض أنا ما طلعتش عريانة علشان حد يعاقبني ويلومني تهاجموني لو أنا اللي نزلت دا أو كان برغبتي، كلام الناس دابحني وما كنتش بعرف أنزل من بيتي، مش من عيب إننا نرقص الناس كلها بترقص في أي فرح مش بيشغلوا قرآن في الفرح ويسمعوه".

موقف صاحبة الفستان الأزرق من الرقص مجددًا

وأكملت: "لو رُحت فرح تاني بعد اللي أنا سمعته من كلام الناس مش عارفة بس عمومًا أنا هفرح ومش هسمح لحد يسيء ليَّ وكلنا خطائين".