ميدو: هؤلاء الأشخاص وراء تسريب عقود لاعبي الزمالك

ميدو: هؤلاء الأشخاص وراء تسريب عقود لاعبي الزمالك.. علق أحمد حسام ميدو، نجم الكرة المصرية السابق على تسريب عقود لاعبي الفريق الأول لكرة القدم بنادي الزمالك تحديدا مصطفى شلبي، ونبيل عماد دونجا.

تصريحات أحمد حسام ميدو

وقال ميدو في تصريحات تلفزيونية: اللاعبين اللي اتسربت عقودهم في الزمالك، متنقيين بالاسم، وموضوع تسريب عقود اللاعبين يهد أي فريق، واللاعيبة دي محتاجة الدعم، وزيدان أول 6 شهور في يوفنتوس كانوا عايزين يمشوه ومش بقارن، لكن بوضح إن أي لاعب محتاج فترة انسجام للتأقلم.

وأضاف أحمد حسام ميدو: لما عقود لاعبي الزمالك تتسرب في التوقيت ده، تعرف إن في مؤامرة مُنظمة من أجل إخلال التوازن بنادي الزمالك.

وواصل نجم الكرة المصرية السابق حديثه: تسريب عقود لاعيبة الزمالك، وأبصملكم بالعشرة، جاي من ناس تنتمي لنادي الزمالك، وعمري ما دخلت انتخابات نادي الزمالك ولا هدخلها، لكن أنا هحارب أي بني آدم هيستغل مشهد معين للعودة إلى الأضواء مرة أخرى على حساب نادي الزمالك.

وأكمل مدرب الإسماعيلي السابق: الزمالك بيمر بأزمة كبيرة، وكل من ينتمي لنادي الزمالك لازم يضع خلافاته مع أي شخص على جنب، لحد النادي ما يوصل لبر الأمان، وبعد كدة اعمل اللي أنت عايزه في لعبة الانتخابات.

وطالب أحمد حسام ميدو في تصريحاته الأشخاص الذين قاموا بتسريب عقود لاعبي الزمالك، بالتعلم من أبناء النادي الأهلي، وقت الأزمات، مشددا على أن من ينتمون لنادي الزمالك هم الذين يقفون ضد نادي الزمالك.

وقال ميدو في تصريحاته: اتعلموا من أبناء النادي الأهلي، وقت الأزمات، يتحدوا من أجل ناديهم، وطول ما الزمالك في ناس عايزين ياخدوا الكرسي على حساب الكيان والنادي، هيفضل الزمالك زي ما هو، مش عشان النادي أقل من حد، لكن عشان فيه بعض المبادئ تاهت.

وأضاف ميدو: اللي صغير بره الزمالك بيفضل صغير، وموضوع تسريب عقود لاعبي الزمالك كشف ناس كتير، ومش هنسمح إن حد يهد نادي الزمالك، خاصة لمن ينتمون إليه.

واختتم لاعب الزمالك السابق: الناس اللي بتنتمي لنادي الزمالك، وبتهد فيه، دول مش زملكاوية، ولا يستحقون أن يكونوا أبناء هذا النادي.