عمرو أديب: 60% من سكان مصر فقراء وعايزين ننظم كأس العالم إزاي!!
قال الإعلامي عمرو أديب: "أستغرب من حديث البعض عن تنظيم مصر كأس العالم بعدما نظمت قطر البطولة، يا جماعة وقت الأزمات نتحدث عن الأولويات دي بلد عندها تنمية اقتصادية و60% فقر وناس عايشة في الأرياف بنوصلها مياه وغاز وناس عايشة علي تكافل وكرامة".
أولويات مصر
وتابع خلال برنامج “الحكاية” المذاع على قناة “إم بي سي مصر”: "تنظيم كأس العالم ايه؟.. احنا عايزين نركز على تعليم وصحتنا وعيالنا، نوصل كاس عالم الأول قبل ما نفكر ننظمه، شوفت تصريحات لوزير الرياضة قالك احنا مش بنفكر في تنظيم كأس العالم".
تنظيم كأس العالم
وأضاف: "الشعب ده غريب يقول مش هنعمل سكة حديد ولا نطورها ولا نعمل بنية تحتية ونفق مين ولا طرق ولا كباري، وفي نفس الوقت يقولك عايزين نعمل كأس العالم ؟ انتوا أي واحد فيهم، احنا في أزمات والعالم مش هيفوق من اللى هو فيه قبل منتصف السنة اللى جاية، احنا قدامنا سنتين صعبين".
مشكلة الدولار والديون
وتابع: "الحمد لله اخواتك في الدول الخليجية قالوا لك الودائع بتاعتنا اللى عندك احنا بنجددها سنة كمان علي ما تاخد راحتك، والسنة الجاية عندك رقم ضخم من الديون لازم تدفعه غير الودائع العربية في ظل زيادة الدولار وارتفاع أسعار المواد الخام، البلد بتعاني ولكن بتتحرك وشوفنا افتتاح المنصورة الجديدة، دخلنا لازم يروح للحاجات المهمة وبس، ويارب نقدر نكمل لإن الضغوط علينا جامدة، ورغم انخفاض الجنيه قدام الدولار يوميا مازالت جهات كثيرة ترى أن الجنيه ليس مرنا بالقدر الكافي، هما عايزين جنيه كاوتش، كانوا بيقولوا حق ربنا سعر الدولار 24.5 جنيه دلوقتي السعر ده اتغير وحق ربنا في الدولار اتغير، الضغوط اللى احنا فيها دي ملهاش إلا حلين الأول هو انتهاء الحرب الروسية الأوكرانية، والحل الثاني أن يحدث تدفقات مالية كبيرة من شأنها أن تحدث التوزان وغير كده الضغوط اللى على البلد مستمرة".
