نهاد أبوالقمصان: «معلمة المنصورة مثالية غصب عنكم.. وناوية أتعلم الرقص»
علقت نهاد أبو القمصان، عضو المجلس القومي لحقوق الإنسان، على واقعة معلمة المنصورة آية يوسف، التي طلقها زوجها، وفصلتها الإدارة التعليمية عن العمل قبل عودتها مجددًا، بسبب فيديو رقص لها على مركب نيلي، إذ قالت «قعدت أفكر في كل الأخبار اللي انتشرت على السوشيال ميديا، ورديت عليهم، وقلت دي معلمة مثالية غصب عنكم، احنا نعرف عن المعلمة المثالية واحنا صغيرين، أنها تكون قريبة من الطلاب بشكل كبير».
المدرس المثالي بالنسبة لنا «الفرفوش والمنفتح»
وأضافت «أبو القمصان»، خلال حوارها في برنامج «حديث القاهرة»، مع الإعلامية كريمة عوض، الذي يُعرض على قناة «القاهرة والناس»: «كنا واحنا صغيرين نكره المدرس القفوش، بنحب اللي يرقص معانا في الرحلة النيلية، المدرس المثالي بالنسبة لنا واحنا صغيرين، اللي هو قريب من الطلاب ومنفتح وفرفوش، ونبقى معاه في الرحلة سعداء ونرقص معاه، وتاني يوم ندخل الفصل معاه، نبقى زي العساكر كأننا منعرفهوش».
نرفض إعدام آية يوسف اجتماعيا.. كل المصريين والمصريات عملوا زيها
وأشارت عضو المجلس القومي لحقوق الإنسان، إلى أنها ترفض فكرة تعليق المشانق لآية يوسف، «أنا لو طالعة رحلة نيلية مع زملائي المحامين، فعلا مش برقص، لأني مش عندي موهبة الرقص، بس ناوية أتعلم، إنما شخص يصورها خلسة، ده منتهى الانتهاك لحياتها، لاقيت الدنيا بتغمق أوي عليها، والإدارة التعليمية فصلتها، رغم أن قانون الخدمة المدنية، لو كانت معينة أو قانون العمل لو كانت متطوعة، لا تنص على الفصل».
تعليق نهاد أبو القمصان على فصل آية يوسف
وتابعت نهاد أبو القمصان: «فصل اية؟ احنا هنهزر، هو احنا في فصل العبودية، كان فيه قهر واقع على الأستاذة آية يوسف من غير معنى، أكل عيشها اتقطع، وأهلها زعلانين منها، وجوزها طلقها، ده إعدام اجتماعي لمجرد أنها طلعت عملت اللي كل المصريين والمصريات بيعملوه، أنا يومها منمتش، قاعدة بفكر، وأقول لنفسي لو آية انتحرت، أنا مش هسامح نفسي، قلت لازم أعرض عليها وظيفة مصحح لغة عربية في مكتبي».
