وفاء سالم تكشف تعرضها للتحرش: انتهكوا طفولتي البريئة بقسوة ووقاحة

وفاء سالم تكشف تعرضها للتحرش: انتهكوا طفولتي البريئة بقسوة ووقاحة.. وفاء سالم تكشف تعرضها للتحرش: انتهكوا طفولتي البريئة بقسوة ووقاحة.. كشفت الفنانة وفاء سالم عبر مقطع فيديو نشرته على قناتها الرسمية على موقع الفيديوهات الشهير اليوتيوب، عن تعرضها إلى التحرش في طفولتها من بعض الأقارب.

 

تعرض وفاء سالم للتحرش

 

وقالت وفاء سالم في الفيديو: "وأنا صغيرة كنت أحب أقعد تحت ترابيزة السفرة، وكنت بلاقي كلهم قاعدين على الكراسي، وأنا في المكان دا مبغيروش، كله بياكل وأنا بسمع صوت الحلل والأطباق والشوك والسكاكين واشم ريحة الأكل، وأنا في دنيا تانية خالص، فكنت بفصل مع نفسي مجرد مابسمع بداية الحوارات، العالم بتاعي ملوش دعوة بالعالم اللي فوق أبدا".

وتابعت: "كانوا بيعتبروني قطتهم السيامي اللي بيلعبوا بيها، القطة السيامي دي كانوا بيقعدوها على حجرهم، وبينقلوها من حجر لحجر، ولما بيحضنوني كانوا بيوجعوا جسمي النحيل، عايزة أزقهم مش قادرة، مش مستحملة الأحضان بتاعتهم، ولما كانوا بيبوسوني كنت غصب عني بامسح البوسة من على خدي، كانوا بيقولولي إنتي ليه بتمحي البوسة مش بتحبينا؟ كنت بتكسف وأقول لا".

وأضافت وفاء سالم: "بوستهم كانت بتشوّك خدي، وريحة نفس السجائر كانت بتضايقني، ببقى عايزة أهرب وأخرج من كل العالم دا، لأن كانت أحضانهم بتوجع جسمي النحيل، وأكتر حاجة لسة فكراها لغاية دلوقتي، كانت بتوجعني جدا، وعاملة جرح في قلبي لما بعض الأغراب والقرايب، كانوا بيقعدوني على حجرهم، وبينتهكوا طفولتي البريئة بقسوة ووقاحة".

وأكملت وفاء سالم: "في الأول مكنتش بفهم، كنت بتكسف أتكلم، كل ده شريط بيلف في دماغي عمري منسيته، لما كبرت كنت بتحس أن الطفلة اللي جوايا لسة موجودة، أنا بحب البراءة، يمكن عشان كدا الطفلة لسة قاعدة جوايا، كان بيحصل معايا حاجات شبه كدا، ولغاية وقت قريب بيدخلولي من مداخل إنتي فتاة أحلامنا، إنتي اللي كلك أنوثة وجمال، واللي محصلتيش، كل دا كان مدخل عشان يوصلوا لحاجة أنا مش عارفة أنطقها أو أقولها".