مصطفى كامل: شيرين عبد الوهاب محتاجة تتعالج.. وهذا موقفي من حسام حبيب
تحدث مصطفى كامل، نقيب المهن الموسيقية، عن إمكانية تحويل حسام حبيب للتحقيق بسبب أزمته مع الفنانة شيرين عبد الوهاب، كما كشف تطورات حالة شيرين الصحية بعد نقلها إلى أحد المستشفيات في منطقة مصر الجديدة.
وقال مصطفى كامل في تصريحات تلفزيونية: كل فنانين مصر والعالم العربي كلموني عشان يطمنوا على شيرين عبد الوهاب ورامي عياش جه بنفسه مصر عشان يدعم شيرين وزارني في بيتي لما عرف إننا هنروح نزور شيرين، ولكن مع الأسف إحنا مش قادرين حتى نخطي باب المستشفى؛ لأن الزيارة ممنوعة.
وواصل مصطفى كامل: تواصلت مع شقيق شيرين عبد الوهاب وقال لي إن شيرين تعبانة حاليا ومحتاجة تتعالج، وأنا ومجلسي بالكامل على أتم الاستعداد لزيارتها هي بس تشاور وأحنا تحت أمرها، ولكن منقدرش نتعدى الدولة، وفوجئت بتعليق البعض عن إمكانية التحقيق مع حسام حبيب، هو أنا جهة نيابية عشان أحقق معاه؟ أنا مقدرش أعمل كدا لأني مش طرف ولا شيرين ولا أسرتها اشتكوا ليا، وبالتالي مليش دعوة بمشاكل حسام مع شيرين، واللي يهمني فقط إنها ترجع شيرين الإنسانة والفنانة.
وأضاف مصطفى كامل: المشكلة حاليا تكمُن في المزايدات اللا منطقية من البعض، وبقول للجميع التزموا الصمت وأنا قاعد على مقعد مش سهل وكل كلمة هتحاسب عليها ومع الأسف بلاقي بعض الأشخاص بيعملوا حبايب وناصفين للحق عشان يعملوا شو إعلامي.
واختتم مصطفى كامل حديثه، قائلا: أنا زعلان على شيرين كـ إنسان وليس نقيب فقط وحالتها تزعل أي حد، خصوصا إن شيرين أول أغنياتها كانت معايا قبل أغنية آه يا ليل، وهي صوت ميختلفش عليه اتنين، ومش هتكلم عن السلوك الشخصي؛ لأني لست ناقدا، وبقول لـ شيرين ربنا يقومك بالسلامة لمصر ولبيتك وأولادك وفنك.
