الجمعة 29 مارس 2024 مـ 02:22 مـ 19 رمضان 1445 هـ
مصر 24
رئيس مجلس الإدارةكمال أبو زيدرئيس التحريرمحمد الجباليالمشرف العامأبو الحجاج العماري

الفنانة إيناس عز الدين تستغيث بـ«الخارجية»: مش عارفة أرجع مصر

إيناس عز الدين
إيناس عز الدين

أثارت المطربة إيناس عز الدين، جدلًا واسعًا، بين جمهورها ومحبيها، بسبب منشورًا مطولًا كتبته عبر حسابها الرسمي بموقع التواصل الاجتماعى "فيسبوك"، تستغيث من خلاله لخروجها من أزمة كبيرة، حسب قولها.

وكتبت عز الدين، في منشورها: "كتير عليا اللي أنا فيه ده عايزة اصرخ لحد ما أحبالي الصوتية تتقطع أنا بموت بالبطيء لوحدي.. ظلم وقهر ومش عارفة حتى استغيث أو لو استغثت استغيث بمين أنا عايزة أرجع بلدي وبيتي ولحضن جوزي وأهلي أنا تعباااااااانة أوووووووي".

منشور ايناس

وبمجرد كتابتها للمنشور، سرعان ما انهالت التعليقات من محبيها متسائلين عن تفاصيل الأزمة، وردت "إيناس" فى تعليقٍ لها قائلة: "الحاجة الوحيدة اللي أقدر أقولها إني في إحدى الدول العربية زيارة وممنوعة من السفر لمصر بسبب ظلم واقع عليا من شخص بقالي سنين بيظلم فيا.. لحد ما خلاني بيعت عفش بيتي علشان أعرف أعيش وأدفع إيجار بيتي اللي مأجراه وادفع القرض اللي عليا وبقيت بشتغل حاجات غير الفن أغلب الوقت علشان أعرف أعيش زي الدعاية والإعلان وإني بجيب ملابس مستوردة وببيعها على الجروب بتاعي اللي فيه بنات كتير عليه وعارفين ده وحرفيًا يوم بعد يوم مستقبلي بيضيع وفي انتظار أي إجراءات".

وأضافت: "بقالي ١٠ أيام دون جدوى ومش عارفة أعمل إيه ولا أرجع بلدي إزاي ولا أروح فين ولا أعيش منين في الغربة ولا ألجأ لمين ولا حتى قادرة أوكل محامي لأن لو في استطاعتي كان زماني عملت كده من زمان و جبت حقي لكن أنا مكتوفة الأيدي".

 

كما دونت تعليق آخر وجاء كالتالي: "أنا في ٩ أيام من الظلم والقهر والخوف نزلت ١٢ كيلو من وزني مش عارفة أبلع بوء المية.. بموت بالبطيء وبحاول أحل الموضوع في سكات لأني مظلومة، وليا حق بس عجزت ومش عارفة أعمل إيه وبحاول أتواصل مع السفارة ووزارة الخارجية المصرية، وأحمد جوزي راح وزارة الخارجية امبارح في مصر، وقدم طلب كتب فيه الموقف، وبحاول أعمل كل شيء قانوني لا يؤخذ عليا بس أنا عاجزة ومتكتفة حتى عن إني أنطق".

وكان المطرب والعازف الأوبرالي أحمد قمري، زوج إيناس عز الدين، كتب منشورًا يستغيث من خلاله لإنقاذ زوجته، وذلك عبر حسابه الشخصي على موقع التواصل الاجتماعى "فيسبوك" حيث كتب: "استغاثة.. أنا لأول مرة أكتب بوست بالشكل ده لكن دي استغاثة لأني مش قادر اسكت ولا أشوف مراتي بتروح مني.. إيناس مراتي في كرب كبير وظلم بكل المقاييس وهي لوحدها تماااااامًا وأنا مش عارف أتواجد معاها نظرًا للظرف نفسه وهي منعاني إني اتكلم أو أحكي لكن الوضع ماعدش يتحمل سكات".

منشور أحمد القمرى

 

وأضاف خلال المنشور: "أنا مراتي بتروح مني و بتموت حرفيًا من القهر والظلم اللي بتتعرضله من شخص ما عندوش ضمير ده غير إنها صحيًا حالتها اتدهورت بشكل لا يمكن حد يتصوره خاصة إنها لسه خارجه من عملية جراحية كبيرة و صعبة وكل ما بتبعتلي صورها بتصدم من الحالة اللي هي كل يوم بتوصلها.. أرجوكم اللي يقدر يساعدني يبعتلي على الخاص ضروري جدًا في أسرع وقت ممكن".

يذكر أن المطربة إيناس عزالدين، طرحت مؤخرًا أحدث أعمالها الغنائية التي تحمل اسم "حلمت بيك" على طريقة الفيديو كليب، وهى من كلمات الشاعر الغنائي أشرف ظريف، وألحان وتوزيع الموسيقي محمد فهمي عبدالحميد.