ياسمين عز لزوجات مشجعي الزمالك: فرعونك عنده أزمة ثقة

وجهت الإعلامية ياسمين عز، رسالة لزوجات مشجعي نادي الزمالك، قائلة: 'فرعونك الزملكاوي عنده أزمة ثقة من بداية الموسم بلاش تقفي له على الواحدة ولو مسك تليفونك قوليله خد راحتك ولو نزل في أي وقت متسألهوش رايح فين وجاي منين'.

وخلال برنامج 'كلام الناس' المذاع علي قناة 'إم بي سي مصر' تابعت عز: 'فرعونك الزملكاوي بيهرب اليومين دول من كل السوشيال ميديا بسبب تحفيل الأهلاوية عليه، وبيقضي معاكي أنتِ أطول فترة ممكنة ونادرا لما يمسك موبايله خليكي أنتي بقى رقيقة معاه ومتزوديش نكد على نكده وحاولي تقللي معاه جرعة النكد واكتمي أي نكد لحد لما موده يتعدل، إحنا دلوقتي في فترة الانتقالات ولاعيبة عقودها بتخلص ولاعيبة بتجدد عقودها وهو عنده مشكلة في العقود فياريت متفتحيش معاه أي عقود خاصة بالإيجار أو أي أي شيء'.

فرعونك الزملكاوي

 

وأضافت: 'فرعونك حبيبك الزملكاوي لو خط دفاعه خذله الفترة الأخيرة لازم تكوني خط دفاعه الأول اللي ميدخلش فيه جون ولو خط وسط خذله لازم تكوني رمانة الميزان في كل قراراته ولو هجوم خذله لازم تكوني مهاجمه الأول مع أي حد يهاجمه'.