فيديو.. وفاء عامر ترد على مزاعم استبعاد منة فضالي لها من أحد المسلسلات

ردت الفنانة وفاء عامر على حقيقة وجود خلاف بينها وبين الفنانة منة فضالي، وإذا كانت الأخيرة استعبدتها من أحد المسلسلات مثلما صرحت في أحد البرامج.

وقالت وفاء عامر خلال لقائها في برنامج كلام الناس مع الإعلامية ياسمين عز: محدش يقدر يستبعدني غير ربنا سبحانه وتعالى والشغل رزق، وحتى لو فيه وقيعة وأنا زعلانة معاكي هل من الشرف إني أستبعدك، يعني لو الكلام ده عليا أنا فهل ده من الشرف والأمانة والدين، بالعكس المفروض ما استبعدش حد وأساعده ياكل عيش.

وأضافت وفاء عامر: ربنا يزيدها ويكرمها ومش تستبعدني بس لأ تستبعد كل الزملاء، ولو هي استبعدتني فشكرا ليها، وأنا أشدت بها في مسلسل جعفر العمدة وكتبت أنها عاملة خطوة مهمة مع محمد سامي ومش هغير رأيي، وأحسن حاجة يكون الواحد قادر يكون عارف قيمة نفسه وعارف إنه ما ينفعش يكون له بديل، ومنة أكيد لو قالت كده فمش قصدها ومش عاوزة أظلم حد، لأننا اتعلمنا نحترم بعض.

وفاء عامر تتحدث عن شائعة إنجابها لـ آيتن عامر

وفي سياق آخر، تحدثت وفاء عامر عن شائعة إنجابها لـ آيتن، حيث خرجت مزاعم من سنوات توضح أن وفاء ليست شقيقة آيتن ولكن والدتها، قائلة: أنا كنت في تانية ثانوي وفيه حاجة اسمها كمبيوتر واللي هيزور حاجة هيروح في ستين داهية، ومش عارفة الشائعة دي كان هدفها غيرة ولا إيه، ده أنا لما بكون وسط مجموعة برفض الكلام على الناس وبرفض أن حد يشتم على حد، والحمد لله فيه ناس كتير بتدافع عني واللي بيكرهوا شوية صغيرين خليهم يمشوا يدوسوا على ضلي.. وتعيش يا ضلي وتكعبل الناس، وتعيشي يا ضحكتي وتفرسي كتير، دلوقتي مش بزعل وزمان كنت بزعل واكتئب.

وأردفت: أمي اتجوزت وهي عندها 15 سنة ولو اتجوزت قد ماما كنت خلفت آيتن، ويا ريت عندي بنت زي آيتن، وبعشق بنت آيتن وبنات أختي داليا لإني بعشق البنات.

كما كشفت الفنانة وفاء عامر سر استمرار زواجها من المنتج محمد فوزي 22 عامًا، مشيرة إلى أن علاقة الحب مع زوجها مستمرة كونها لا تحكي مشكلاتهما لأي شخص وحتى لابنها.

وأوضحت وفاء عامر خلال استضافتها في برنامج كلام الناس مع الإعلامية ياسمين عز عبر قناة إم بي سي مصر: كلمة السر في استمرار زواجي إن ما حدش بيعرف حاجة عن مشاكلي مع جوزي، ومفيش حد مش بيتخانق والحياة مش وردي مع كل الناس ولكن الأهم إنها ما تطلعش بره البيت.

نصيحة وفاء عامر للزوجين

وأضافت وفاء عامر: لما أكون زعلانة وعند أمي مش بعرفها وبقول إني رايحة أعمل أكل لسي محمد، ومش بعرف حتى ابني، لأني أعتقد إن أي حد بيتدخل في موضوع علشان يحل الموضوع بيكبر بسبب الكرامة، لذلك أنا بنصح أي زوج وزوجة لو زعلانين مفيش حد يتدخل بينهم ولو حد صمم لازم الآخر يتنازل ولازم يعرفوا بعض قبل الجواز علشان الأطفال مالهمش ذنب، لإن أنتم خلفتم واتجوزتم على حب واقتناع ومفيش حد بيتجوز غصب، ليه تخلفوا والولاد يضروا نفسيا وماديا.

وأكدت وفاء عامر أن سر استمرار أي علاقة حتى علاقة الأصدقاء هو عدم تدخل أي أحد وقت الخلافات، مضيفة: العتاب بالنسبة لي على قد المحبة، والاعتراف بالمحبة والمعروف دَين مش دين فقط، دين لإن ربنا محبة وجمال وخلق فينا الخير، ودَين لإن لما حد معترف بحبك وصاحب فضل عليك ده دَين في رقبتك لو محترموش امنعيه.