سمية الخشاب تتقمص شخصية ياسمين عز وتوجه نصائح للستات

سمية الخشاب تتقمص شخصية ياسمين عز وتوجه نصائح للستات.. سمية الخشاب تتقمص شخصية ياسمين عز وتوجه نصائح للستات.. يبدو أن الفنانة سمية الخشاب، قررت تقمص شخصية الإعلامية ياسمين عز، في تقديم نصائح غريبة للسيدات، مؤكدة أن الحب ليس فقط بين الرجال والنساء، وأن المرأة يمكن أن تحب نفسها أكثر.

وقالت سمية الخشاب في مداخلة هاتفية مع الإعلامية سهير جودة، ببرنامج الستات، عبر فضائية النهار: "الست لا بد أن تحب نفسها أولا، وأن تقدر نفسها وتمتن لكل شيء جيد في حياتها، مشيرة إلى أنه لا يشترط أن تكون الست سعيدة، إذا كان هناك شخص آخر في حياتها، فالست قادرة على إسعاد نفسها بنفسها دون أن تحتاج لأحد".

وقالت سمية الخشاب: «أنا ادلع نفسي بنفسي، ولو هجيب هدية لنفسي هتبقى بيجامة عشان الجو البرد، او برفيوم، او اي حاجة نقصاني هتخليني فرحانة ومبسوطة، ايه المشكلة يعني، الحياة بسيطة أوي، متوقفوش سعادتكم على حد، حبي نفسك وهادي نفسك، وانبسطي».

 

نصيحة سمية الخشاب للستات

ووجهت سمية الخشاب نصيحة للستات، قائلة: «الست لازم تبطل تفتش ورا جوزها، لان الراحل لو عايز يعمل حاجة هيعملها، بلاش تشغلي نفسك وتنحري نفسك، وقلبك يتوجع، هو لازم يبقى بيحبك من نفسه وبيثق فيكي وبتثقي فيه، متشتغليش ضابط مباحث او وكيل نيابة او محقق على جوزك، انتي كدة بتضيعي طاقتك وهتتصابي بالامراض، ليه كل دة وعشان مين، وفري المجهود دة لنفسك، وفكري ازاي تسعديها».

 

وتابعت: «اتفرجي على فيلم جميل، واعملي فشار، روحي اعملي ماسك لوشك واهتمي بجمالك»، مشيرة: «انا بهتم بنفسي وبدلعها، وبمتن لربنا، واعمل ماسكات لشعري، والعب مع القطة بتاعتي، انا بقيت بحب القطط مؤخرا وبعشقهم، اتبنوا قطط يا جماعة، دول بيمتصوا الطاقة السلبية من البيت، بيصدروا موجات بصوتهم وبيمتصوا بيها اي طاقات سلبية، اللعب مع الحيوانات زي القطط والكلاب بيخليكوا اسعد ناس في الدنيا».

 

آخر الأعمال

 

يذكر أن آخر أعمال سمية الخشاب مسلسل «موسى» بطولة الفنان محمد رمضان، وعبير صبري، ورياض الخولى، وسيد رجب، وحمدي وزير، وأمير صلاح الدين، وغيرهم من الفنانين، تأليف ناصر عبدالرحمن، وإخراج محمد سلامة.