غير مصرح بيك.. المطرب أحمد سالم عن سبب منعه من الغناء في حفل أصالة

كشف المطرب أحمد سالم سبب عدم مشاركة الفنانة أصالة في حفلها بمهرجان الموسيقى العربية داخل دار الأوبرا، مؤكدُا أنه أدى جميع البروفات داخل الأوبرا.

 

وتحدث المطرب أحمد سالم عن بداياته، وانتشار فيديو له وهو يغني أثناء تأدية عمله، وذلك من خلال تصريحات تلفزيونية في أحد البرامج، حيث قال: الفيديو بتاعي أنا عامله في دبي، كنت شغال هناك، وبقالوا سنتين، وبعديه لقيت ناس كلمتني بعد كده بتقولي اتشهرت، وبحب الدندنة، وكان الطبيعي بتاعي علشان أبقى منسجم، وعملت الفيديو من غير قصد ذكرى ليا، والأستاذ رامي جمال دعمني، وحاليا بنعمل أغنيتين، وعملت كذا حاجة بردو.

 

وتابع المطرب أحمد سالم حديثه عن سبب منعه من الغناء في حفل الفنانة أصالة داخل دار الأوبرا، إذ قال: مكتب الأستاذة أصالة كلموني وقالولي عايزينك في حفل الختام في الأوبرا، ومكنتش مصدق واتبسطت، وروحت البروفة، وعملتها، ونزلت فيديو من هناك، وكنا هنغني أغنية الحقيقة أنا وأصالة، وفوجئت يوم الأربع قبل الحفلة بيوم الساعة 8، جالي تليفون من المكتب قالولي عندك مشكلة في الأوبرا، وروحت على الأوبرا علشان أعرف المشكلة، واستنيت لحد الساعة 10، وقالي أنت غير مصرح بيك، يعني المهرجان هيبقى فيه معالي الوزيرة وناس كتيرة حاضرة، لكن أنت محدش كتب اسمك، وكان المفروض حد يبلغ بيك، وكنت عامل البروفات جوه الأوبرا.

أحمد سالم: الحفلة مع الفنانة أصالة كانت هتفرق معايا كتير أوي

وأردف أحمد سالم في حديثه، قائلًا: حاجة زي دي كانت هتفرق معايا كتير، وقولتلهم إيه المطلوب أعمله، قالولي مش هنلحق نبلغ بيك دلوقتي، وكلمت مكتب أصالة قالولي فيه سيب رقم تليفونك ولو في حاجة جديدة هنكلمك، والستايلست كانت عندي وجهزت البدلة وكل حاجة، وده تدبير ربنا الحمد لله، ومحدش قالي على ورق ولا أي حاجة، والناس دخلت عندي تقولي أنت مطلعتش ليه، وعملت فيديو صغير وقولت فيه متطلعتش بسبب أسباب معينة.