الراقصة هندية: ارتديت النقاب 3 سنين.. والفنان أحمد دياب أقنعني بخلع الحجاب
تحدثت الراقصة هندية، عن فترة اعتزالها وارتدائها الحجاب، كما كشفت عن ارتدائها النقاب لمدة 3 سنوات، مؤكدة أنها تراجعت عنه بـ أمر من الطبيب الخاص بها.
وقالت هندية، في تصريحات تليفزيونية: تزوجت من دكتور جامعة لمدة 11 سنة، وكان بيدعمني وبيساعدني، كنت بقول له هلبس حجاب كان يوافق، حتى أنا لبست نقاب لمدة 3 سنين، والموضوع بدأ إني كنت قاعدة في الجامع وبصلي وواحدة جت رمت كُتيب في حجري، وأول حاجة قرأتها إن لازم الست تلبس كفن قبل الوفاة.
ماتحجبتش علشان مابقاش كذابة ولكن غطيت شعري
وأضافت: أنا اترعبت وقُلت يا خرابي، ونزلت لقيتهم بيبعوا الملحفة جبتها ولبستها، وخفت قُلت دي رسالة مبعوتالي، وقلعته لما تعبت وجالي حساسية صدر، وروحت لـ دكتور قالي اقلعي النقاب وأنا مسؤول.
كما تحدثت عن ارتدائها الحجاب، قائلة: أنا متحجبتش علشان مبقاش كذابة، ولكن غطيت شعري ولبست إيشارب صغير، وبعد انفصالي عن زوجي دكتور الجامعة أصدقائي قالولي لازم تنزلي وتتحركي.
وأضافت، أن الفنان الراحل أحمد دياب، هو من أقنعها بالتخلي عن الحجاب، موضحة: قابلت الفنان أحمد دياب رحمة الله عليه، قالي يا أبيض يا أسود، يا تقلعي الحجاب خالص علشان تمثلي يا تقعدي في البيت، وقلعت الحجاب بعد 11 سنة.
أما عن قرار اعتزالها الرقص والتمثيل، فعلقت قائلة: بغض النظر عن زوجي أيمن السويدي، ووفاة أخويا، أنا من جوايا كنت عايزة اعتزل الرقص، لأننا كنا كل رمضان بنعمل بروفات شهر بحالها، كنت طول الوقت عندي تردد إني أكمل في المهنة وعندي هاجس ديني، ولما جت وفاة أخويا خدت القرار نهائي.
واستكملت هندية، متحدثة عن سبب رجوعها للفن مرة أخرى قائلة: أنا كنت بخلص صلاة العشاء وأعمل كل الطقوس والتسابيح، وبعدها كنت بقعد عندي حالة من الزهق وهما استدرجوني واحدة واحدة، وهما كانوا فاهمين إنهم لما يرجعوني الوسط الفني يبقى كده بيخدموني، ولكني ملقتش استقبال من المنتجين.
وأكدت هندية، أنها عادت للفن مرة أخرى، بعدما أرسل الله لها إشارة للعودة مرة أخرى، موضحة: دخلت الوسط الفني بقرار من ربنا وخرجت منه بقرار منه، وكنت بسجد لـ ربنا وأقوله يا رب لو مش عايزني إديني علامة، وأنا صلتي بـ ربنا كويسة جدًا لغاية دلوقتي صلاة وتسابيح وقراءة قرآن وبحج وبعتمر، وبعمل كل الطقوس اللي ربنا أمرني بيها.
أما عن قرار خلعها الحجاب، فعلقت قائلة: إني بينت شعري دي حاجة بيني وبين ربنا، سألت ربنا كتير جدًا إن لو مش عايزني أبين شعري يديني علامة، وأول يوم بينت شعري كنت حاسة إني عريانة.
