فاطمة عيد تدافع عن طبيب الكركمين: جوزي اتعالج بسببه.. وليه نعمل من الحبة قبة

تحدثت الفنانة فاطمة عيد من جديد عن أزمة مشاركتها في إعلان الكركمين بعد القبض على الدكتور أحمد أبو النصر، حيث كانت تعرضت لانتقادات وقتها.

فاطمة عيد: الكركمين حقيقي وجوزي اتعالج منه

وقضت المحكمة الاقتصادية بمعاقبة المتهم أحمد أبو النصر، المعروف إعلاميا باسم طبيب الكركمين، سنتين مع الشغل وغرامة 100 ألف جنيه، ومصادرة المضبوطات، كما عاقبت المتهم الثاني عبد الونيس حسن محمد سنة مع الشغل وغرامة 1000 جنيه، لاتهامه ببيع أعشاب ونباتات طبية مخالفة للاشتراطات الصحية، تحت مسمى كركمين، على مواقع التواصل الاجتماعي.

وقالت فاطمة عيد، خلال لقائها في أحد البرامج: الكركمين حقيقي وجوزي اتعالج منه كان بيشتكي مر الشكوى، مشي على تعليمات الدكتور وربنا شفاه، هدافع عنه ليه لو هيسيء ليا، لو كنوز الدنيا مش هقبل، الراجل مشي في النور، ما كانش عليه مشاكل، ووراني مستندات وماشي في النور.

وأضافت: وقفت جنبه لأنه ما أساءش لحد ولا غلط ليه نعمل من الحبة قبة حرام، والإعلان مش بفلوس كان مجاملة وهو مؤدب ومحترم، لما حاجة جربناها ولقيناها نجحت ليه مش هقف جمبه، هو قدم السبت وأنا قدمت له الأحد.. وزي ما بيقولوا تراعيني قيراط أرعيك قراطين، وربنا بيقول ارحموا من في الأرض يرحمكم من في السماء.

ومن ناحية أخرى تحدثت فاطمة عيد عن علاقتها بضرتها، مشيرة إلى أن علاقتهما كانت جيدة وكانا مثل الأخوات، مضيفة: بعد الزواج أهل زوجي رضيوا عني كل الرضا، وصاحبت ضرتي، بقيت أنا اللي بكلمها وعاوزه أي حاجة ألبيها لها، الجواز والرزق في عمر الغيب ومكتوب، وحبتني أكتر من نفسها، فالجواز والعمر رزق ومكتوب وإحنا مكتوبين لبعض حتى لو زعلتي زعلك مش هيفيد خلاص الفأس وقعت في الرأس لا مفر، وكل حاجة مكتوبة عند ربنا.

واستكملت: كسبتها بمعاملتي الحلوة إحنا أخوات والجواز قسمة ونصيب.. وكل حاجة بتاعت ربنا، وربنا اللي نفذ وجوزي انبسط لما شفنا كويسين مع بعض، وانبسطت أني قدرت أخليها تحبني، وأحبها ما كنتش مرسومة.