عمرو أديب لـ السيسي: إحنا بنعاني وخايفين على عيالنا ولو في انفراجة قولوا لنا

قال الإعلامي عمرو أديب: "سعيد جدا أن الرئيس اتكلم عن خوف وقلق المصريين، نعم سيادة الرئيس إحنا مش خايفين على مصر إحنا خايفين على نفسنا، إحنا مش قلقانين على مصر إحنا قلقانين على نفسنا وعيالنا، والحالة اللى اتكلمت عنها موجودة وفي حالة قلق بكل بيت مصري وخوف من المستقبل، إذا كان عام 2022 عام الأزمة فالمفترض أن عام 2023 يكون عام الحل".

مخاوف وقلق الناس بسبب الأزمة الاقتصادية

وتابع خلال برنامج “الحكاية” المذاع علي قناة “ام بي سي مصر:"سيادة الرئيس الخوف والقلق مبرر، المخاوف الرئيسية موجودة عند البقال والسوبر ماركت ومصروف المدرسة ومصروف البيت والدروس الخصوصية، بسبب الأزمة اللى احنا فيها".

عناء المصريين بسبب الأزمة الاقتصادية

وأضاف: "الخوف والقلق موجودة خاصة بعد القرارات اللى تم اتخاذها الأيام اللى فاتت، وأنا سعيد بالسنة الجميلية اللى عملتها ياريس ويا ريت الحكومة هي كمان تطلع تتكلم، الواقع اللى إحنا فيه صعب ومؤلم وبنعاني وأغلب الناس تعاني حتى الأغنياء والطبقة المتوسطة والفقيرة يعانوا الكل يعاني والعالم يعاني وياريت المسئولين يطلعوا يشرحوا للناس إيه اللى بيحصل، وياريت يكون حديثك فاتحة خير والمسئولين يطلعوا يتكلموا، وهناك إجراءات اقتصادية يتم اتخاذها كل يوم ياريت تتشرح للناس".

توضيح الحكومة الوضع الاقتصادي لمصر

وأكمل: "الحكومة عندها كل الأرقام والمعلومات لكنها مش موجودة عند الناس وعلشان كده بيجتهدوا في فهم ما يحدث وما سيحدث".

وتابع: "الصورة الكاملة يجب أن تكون واضحة للشعب من أصغر واحد لأكبر واحد، علشان الكل يكون عارف ايه المستقبل".

وأكمل: "لو احنا بنعمل حلول صعبة وهيبقى فيه انفراجة قولوا لنا الانفراجة امتى، الحكومة لو عارفة والناس مش عارفة هنبقى طول الوقت معرضين للقصف من الجبهة الأخرى".

رسالة عمرو أديب للرئيس السيسي

وتابع:"بقول للرئيس السيسي وقت الأزمات محدش بيثق في حد، لازم نبنى الثقة عند الناس، انا عايزك تطمنى وتقولي فيه حاجات نقدرنعملها وحاجات منقدرش".

تأثيرات الأزمة الاقتصادية علي العالم

ووجه الرئيس عبد الفتاح السيسي، من كاتدرائية العاصمة الإدارية الجديدة خلال تهنئته الأقباط بعيد الميلاد المجيد، رسالة للمصريين المتخوفين والقلقين على بيع قناة السويس.

الرئيس عبد الفتاح السيسي

وقال الرئيس السيسي:"أنا شايف وسامع كويس أوي أن الناس في مصر قلقانة، طيب انت قلقان ليه؟ يقولك انا خايف عليها، وانا سعيد بخوفك عليها، ومتقلقوش ان ربنا موجود وهو أعز وأكبر من الكل وقادر يعمل كل حاجة طيبة لينا، واحنا بنحاول نبقى نستحق، وثانيا احنا كمسئولين حريصين علي التعامل مع الأزمة الكبيرة في العالم اللى تأثيراتها ضخمة، والدنيا هتبقى بعد الأزمة الأخيرة دي هتبقى مختلفة عن الدنيا اللى شوفناها قبل كده والأزمة الاقتصادية دي هتأثر في دول كتير لو الحرب الروسية الأوكرانية استمرت السنة دي او اكتر، واحنا الحمد لله رب العالمين ماشيين كويس ولو كنا بنعاني اَه بنعاني بس منخافش ومنقلقش وبقول من فضلكم متسمعوش للناس اللى متعرفش".

هل ستباع قناة السويس؟ السيسي يرد

وتابع:"فيه ناس بتقولك قناة السويس مش عارف هيعملوا فيها ايه، وخلي بالك هيبيعوا حاجة منعرفش عنها حاجة، انا برد واقولهم ليه هنخبي عليكم؟ مش هاقول ليه؟ لو فيه حاجة هاعملها هقولكم كلكم وزي ما انا بتكلم دلوقتي هتكلم واقول، وهي مصر لو تعبت هنتخلى عنها؟ انا بتكلم صحيح يبقى خلاص وعام سعيد علي الاقباط وكل المصريين".